मेळावलेकारांचें जैत : प्रमोद सावंताचें ‘बें’

मेळावले येवपी नियोजीत आयआयटी प्रकल्प रद्द जाल्ल्याचें तेणें जाहीर केलें.

पुलिसांनी आंदोलकांचेर फायल केल्ल्यो केशी फाटीं घेवपाचेर विचार करतलों अशेंय तेणें सांगलें.

पूण न्हिदिल्ले बायलेच्या हड्ड्यार पुलिसान पांय दवरूंक ना, जाल्यार लोकांनीच शस्त्रां वापरून 6-7 पुलिसांक जखमी केले अशें सावंतान सांगलें.

मेळावलेकारांनी जमिनीच्या डिमार्केशना विरोधांतलें झूज निमणे कडेन जिखलें.

आंदोलकां मदले एके बायलेच्या हड्ड्यार पांय दवरून पुलीस निरीक्षक जेन्ना फुडें गेलो तेन्ना मात ते खुबळ्ळे, आनी त्या उपरांतच पुलीस आनी आंदोलकां मदीं खेटाखेटी सुरू जाली.

पुलिसांनी टीयरगॅस सोडलो आनी आंदोलकांचेर लाठी चार्जय केलो.

हातूंत पुलीस जखमी जाले.

सत्तरींतल्या हेर गांवांतल्या लोकांनीय मेळावलेकारांक तेंको दिलो.

आंदोलन बळिश्ट जालें आऩी निमणे कडेन थळावो आमदार विश्वजीत राणेक नमतें घेवन प्रकल्प मतदारसंघा भायर घेवन वचात अशी विनवणी करची पडली. 

विश्वजीतान प्रकल्प मतदारसंघा भायर व्हरचो अशें मागलेंच, ते भायर आऩीक कांय फुडाऱ्यांनीय मुख्यमंत्र्याक तशी विनवणी केली.

आयआयटी मेळावलेच्यान भायर व्हरात अशें मागपी निवेदनां आपणाकडेन पावलीं अशें सावंत सांगता.

 मेळावलेकारांनी पयल्या पांवड्या वयलें झूज जिखलां, पूण संघर्श अजून सोंपलो ना.

कारण आयआयटी हें वादाचें मूळ नासलें, जाल्यार सत्तरींत जमिनींच्या अधिकाराचो प्रस्न कळीचो प्रस्न आसा.

देखून फकत आयआयटी भायर व्हरात अशेंच सांगून मेळावलेकार वगी रावले नात जाल्यार आपल्यो जमिनी परत आसल्यो तश्यो आमच्या नांवार करून दियात अशेंय तेंच्यानी मागलां.

ह्या निमतान गोंयभरच्या विविध संघटनांनी कूळ आनी मुंडकार कायदो चालीकक लावचो अशी मागणीय फुडें केली.

आतां सरकार किदें करता ताचेर सगळ्या गोंयकारांचें लक्ष लागून रावलां.