पर्रीकारच आसतलो मुख्यमंत्री, काँग्रेस म्हणटा हातूंत आसा राफेल भानगड
पर्रीकारच आसतलो मुख्यमंत्री, काँग्रेस म्हणटा हातूंत आसा राफेल भानगड
23 Sep 2018 08:03 PM
काँग्रेसीन ह्या निर्णयाचेर राग उक्तायला. तशेंच पर्रीकाराकडेन राफेल करारांतल्या भानगडींची म्हायती आसा देखून मोदी आनी अमित शहा पर्रीकाराक भितात असोय आरोप विरोधी पक्षान केला.
आयतारा सांजे भाजपा अध्यक्ष अमित शहान ट्विटराचेर ही खबर फोडली. ताचो हिंदींतलो हो ट्वीट सांगता – गोंय प्रदेश भाजपाच्या कोर टिमीकडेन चर्चा करून हो निर्णय घेतला कीं गोंयचो मुख्यमंत्री मनोहर पर्रीकारच आसतलो आनी तोच गोंयचें फुडारपण करतलो. प्रदेश सरकाराच्या मंत्रीमंडळांत आनी खात्यांनी मात रोकडोच बदल जातलो.
फेब्रुवारी म्हयन्यांत मनोहर पर्रीकाराक स्वादुपिंडाचें दुंयेस जायतसावन सरकारांतली ही अस्थिरता चालूच आसा. हें दुयेंस कसलें तेंय सरकारान अजून अधिकृतपणान जाहीर केल्लें ना. परत परत अमेरिकेक उपचाराक वचत रावतकीर ऐन चवथीवेळार पर्रीकाराक दिल्ली एम्स हॉस्पिटलांत व्हरून घालचो पडलो.
तेन्नाच आतां हांव सकयल देंवतां अशी इत्सा पर्रीकारान उक्तायली आनी ताका लागून दुसऱो फुडारी सोदपाक भाजपान तीन म्हालगड्या केंद्रीय फुडाऱ्यांचो पंगड गोंयां धाडलो. उपरांत तांच्या अहवालाचेर अमित शहान दिल्ली गोंयची कोर टीम आनी खासदारांवांगडा तशेंच पर्रीकारालागीं चर्चा केली. आनी निमणे ताणे हो निर्णय जाहीर केला. पर्रीकारच मुख्यमंत्री उरतलो. बदलतले ते कांय मंत्री आनी कांय खातीं.
ह्या बोवाळांत पर्रीकार परत सट्ट करून विधानसभा बरखास्त करीत अशी भिरांत काँग्रेसीन उक्तायिल्ली आनी आमी पर्यायी सरकार घडोवपाक शकतात असो दावोय राज्यपालामुखार वचून केल्लो. हे फाटभुंयेर भाजपाचो हो निर्णय म्हणल्यार मग्रुरी अशें काँग्रेसीचो गोंय प्रदेशाध्यक्ष गिरीश चोडणकार म्हणटा.
इतलेंच न्हय, ताणे
आऩीकय एक बाँब घातला. पयलीं भारताचो संरक्षण मंत्री आशिल्ल्या पर्रीकाराक राफेल
करारांतल्यो भानगडी खबर आसात देखून प्रधानमंत्री नरेन्द्र मोदी आनी अध्यक्ष अमित
शहान पर्रीकाराक भीवन हो निर्णय घेतला असो सणसणीत आरोप ताणे केला.
What do you feel
Click here