राजभाशेक राजपत्रांत कित्याक सुवात ना?: अशोक भोसले

गोंयांत राजभास कायदो चालीक लावंक ना तो ना, पूण अजूनय कोंकणींतल्यान राजपत्रय येना. ते खातीर परत एकदां आंदोलन करचें पडटलें. पिरायेचे 65 त पाविल्लो कोंकणी चळवळींतलो म्हालगडो वावुरपी अशोक भोसलेन, तरनाट्यांक लजेवपी भाशेंत आयचे नवे पिळगेक उलो मारलो.

कोंकणी राजभास कशी जाली?  ह्या कोंकणी चळवळीचो इतिहास सांगपी संजीव वेरेंकाराच्या पुस्तकाचें शेनवारा पणजे प्रकाशन जालें.

त्या सुवाळ्यांत तो उलयतालो. माचयेर राधिका भाटीकार, पुस्तकाचो लेखक संजीव वेरेंकार, कर्नाटकांतले कोंकणी भाशीक अल्पसंख्यांक संस्थेचो संस्थापक डॉ. कस्तुरी मोहन पै, अस्मिताय प्रतिश्ठानाचो अध्यक्ष  अरविंद भाटीकार, गोवा 365चो सल्लागार संपादक संदेश प्रभुदेसाय, आनंद वाघुर्मेकार आनी सिद्धी प्रभू हजर आसलीं.

कोंकणीक राजभास करपा खातीर वावर केल्ले रमेश कोमरपंत आनी अशोक भोसलेचो डॉ. कस्तुरी मोहन पै हस्तुकीं भोवमान जालो.

एका तेंपार जायते म्हालगडे कोंकणी खातीर संघर्श करत रस्त्यार देंवले, त्या फायटरांची मोख पुराय करपा खातीर आयचे तरनाटे  रस्त्यार देंवतना दिश्टी पडनात.

तांकां खोचकपणान पोटर अशे पाचारत अरविंद भाटीकारान आनी ताचे बरोबर संदेश प्रभुदेसायानय आयचे तरुणाईक साद घालो.