निमणे इत्से प्रमाण पद्मश्री सुरेश आमोणकाराचो देह भेटयलो जीएमसीक
निमणे इत्से प्रमाण पद्मश्री सुरेश आमोणकाराचो देह भेटयलो जीएमसीक
09 Dec 2019 07:34 PM
समाजीक लागणूक मानतल्या एकादऱ्या तपस्व्याक सोबपी असो विचार प्रत्यक्षांत आयलो.
दुयेंसा कडेन झूज दियत गोंयचो म्हालगडो साहित्यीक सुरेश गुंडू आमोणकारान आयतारा निमणो स्वास घेतलो.
विविध भाशेंतले ग्रंथ आपले विशेश शैलींतल्यान अणकार करपी, एक लेखक, शिक्षण तज्ञ आतां मेडिकल सायन्साच्या भुरग्यांक वेगळी देख दितलो. सासणा खातीर.
कोंकणी ग्रंथांच्या अणकाराच्या मळार ताणें देखदिणो वावर केला.
थिरुकुरल ही तामीळांतली साहित्यकृती, मराठी भगवद् गीता आनी ज्ञानेश्वरीचो कोंकणींतल्यान अणकार, शिखधर्मीय गुरू गोविंद सिंग हांची शिकवण सांगपी जपुजी साहेबचो पंजाबींतल्यान कोंकणी अणकार, ख्रिस्तपुराणाचो कोंकणी अणकार अशे साबार म्हत्वाच्या ग्रंथांचें ज्ञान कोंकणींत हाडून ताणें कोंकणी गिरेस्त केल्या.
गोंय सरकाराचो आदर्श शिक्षक आनी केंद्र सरकाराचो पद्मश्री पुरस्कार भेटोवन ताका सन्मानीत केल्लो.
नवें गोंय कोण उबारतलो? भुरग्यांनो तुमी गोंय सोडून कित्याक भायर वचपाक सोदतात?
गोंय हीच तुमची कर्मभूंय. तुमचें शिक्षणच तुमकां घडयतलें. तुमीच तुमचो फुडार.
काम ना म्हण निर्शेव नाकात. भायले भितरले भेद करू नाकात.
कसलींच कामा करपाक लजेव नाकात.... गोंयच्या फुडाराची काळजी आशिल्ल्या सुरेशबाबान भुरग्यां मुखार काडिल्लीं हीं मोगाळ उतरां म्हणल्यार ज्ञानेश्वराचो विश्वात्मक आर्त उलोच.
आतां ही कळकळ परत आयकपाक मेळचींना.
म्हापशेंच्या जीएस आमोणकार विद्यामंदिरांत, जंय प्राचार्य म्हण ताणें कांय पिळग्यो घडयल्यो त्या विद्यालयाच्या सभाघरांत ताची कूड सोमारा निमण्या दर्शना खातीर दवरिली.
वेगवेगळ्या मळांवेल्या तज्ञ-मानेस्तांनी ताचे कुडीचें निमणें दर्शन घेतलें.
सांजवेळार
ताचें पार्थीव जीएमसींत व्हेलें.
What do you feel
Click here