गोंयच्या तारवटींक भाजपा सरकारा कडल्यान कोवीडाच्या काळांत तुच्छ वागणूक : विजय

सीडीसीची समस्या सोडोवपाचें उतर केंद्रीय आयुशमंत्री श्रीपाद नायकान तारवटींक दिलां. गोंयां भायर वचून वेगवेगळ्या सुवातांचेर काम करपी गोंयचे तारवटी म्हटल्यार गोंयचे एम्बासिडर. गोंयाचें ते खऱ्या अर्थान संवसारभर प्रतिनिधीत्व करतात. तांचे मजतीक सरकार सदांच तयार आसतलें अशेंय श्रीपाद नायकान सांगलें. जाल्यार कोवीडच्या काळांत गोंयच्या तारवट्यांक गोंय सरकारान तुच्छ वागणूक दिल्ल्याचो आरोप गोवा फॉरवर्डाचो आमदार विजय सरदेसायान केलो. दोगूय ह्या सुवाळ्या निमतान एके माचयेर आयिल्ले.

गोवन सीमेन असोसिएशन ऑफ इंडियाच्या धाव्या वर्सुकी दीस सुवाळ्यांत तो उलयतालो. मडगांवां ही कार्यावळ जाली. परदेशांनी नोकऱ्यां निमतान गेल्ल्या गोंयच्या तारवट्यांनी गोंयचे अर्थवेवस्थेक हातभार लायला अशेंय केंद्रीय आयुश मंत्री श्रीपाद नायकान सांगलें. जाल्यार तारवटी गोंयांत नोकऱ्यो मेळ्ळ्यो नात म्हण सात दर्या हुपून दुसऱया देशांनी पोटा खातीर गेले. पूण गोंयांत येतकच तांकां गोंयकार म्हण जसो मान मेळपाक जाय तसो सरकार दिवपाक पावलें ना हाची खंतय विजय सरदेसायान हे माचयेर उक्तायली. आयकात दोगांकय.