भायल्या नुस्त्याचे 15 दीस बंदी. उपरांत कितें? पर्रीकार म्हणटा, राव!

भायल्या नुस्त्याचे 15 दीस बंदी. उपरांत कितें? पर्रीकार म्हणटा, राव!

18 Jul 2018 02:56 PM

सात दिसां उपरांत निमणे मुख्यमंत्री मनोहर पर्रीकारान खर पावलां उखल्लीं. भायल्यान येवपी नुस्त्याचेर बंदी घातली. पूण फकत फुडल्या 15 दिसांखातीर.



बिरेस्तारच्यान गोंयचे शिमेचेर चेकिंग सुरू जातलें. तितले म्हणसर गोंयची नुस्त्यावेली बंदी उठ्ठली आनी गोंयकारांक गोंयचें ताजें नुस्तें मेळटलें.

पूण 15 दिसां उपरांत भायल्यान येवपी नुस्त्याचें कितें? तें स्वता पर्रीकारय नकळो.

अन्न आनी वखदां प्रशासनान फुडल्या 15 दिसांभीतर आपली यंत्रणा तयार करची असो आदेश ताणे दिला.

फाटल्या बिरेस्तारा भायल्या नुस्त्यांत फॉर्मेलीन मेळतसावन हरशींय गोंयकारान नुस्तें खावप बंदूच केल्लें. पूण ते खातीर एफडीएन केल्लें तें पयलें आनी निमणें इन्स्पेक्शन.

आतां  मुख्यमंत्री पर्रीकारच मान्य करता, एफडीएलागीं शिमेचेर रावन फॉर्मेलीन चेक करपाची पुराय यंत्रणा ना. ताका लागून ताणे आतां नुस्तें भीतर हाडपाचेरच बंदी घातल्या.

आनी फुडल्या 15 दिसांभीतर यंत्रणा तयार करपाचो आदेश दिला.

पूण नुस्त्यांभीतर खऱ्यांनीच फॉर्मेलीन आशिल्लें काय ना? मर्यादेभीतर नुस्त्यांत फॉर्मेलीन आसता? ह्या असल्या सगळ्या प्रस्नांचेर पर्रीकार सध्या उलोवपाकच तयार ना.

घडये बिरेस्तारच्यान विधानसभा अधिवेशन सुरू जाता म्हुणून आसत, पूण मुख्यमंत्र्यान ह्या प्रस्नाचेर तोंडाक गुड्डो माल्ला.

मात एक गजाल बरी केल्या. नुस्त्यावांगडा फळां आनी भाजयांभीतरय रसायनां आसतात काय कितें तेंय तपासपाचो आदेश दिला.

पूण कळीचो मुद्दो आजून तसोच आसा. पंदरा दिसांउपरांत कितें?

आमचें नुस्तें येवपाक लागतलें हें बरें आसा. पूण नुस्तेकारांनी भायल्यान येवपी नुस्तें गोंयच्या नुस्त्यांमदीं मिस्तुराद केलें जाल्यार? तें कशें कळटलें?

पर्रीकार म्हणटा, राव विचार करया.



Editing:



What do you feel

Click here